På garden Maurstad i Skjåk møter vi to bønder som brenn for det dei held på med. I den nyaste episoden av Dalir-podden inviterer Liv Oddrun Maurstad og André Husom oss inn i kvardagen som mjølkeprodusentar, dyrevenner og matprodusentar i ei bygd der landbruket framleis står sterkt.
Her får lyttarane bli med inn i fjøset, ut på beite og opp til fjells, der kyrne kvar sommar blir frakta fleire mil til fjellbeite. Liv Oddrun fortel om korleis dei brukar mykje tid på kalvane for å få rolege og tillitsfulle dyr, medan André deler erfaringar frå mange år med målretta arbeid for høg mjølkekvalitet.
Samtalen handlar også om utviklinga i landbruket i Skjåk. Etter nokre år med nedleggingar ser dei no fleire unge bønder som satsar. Det gir optimisme for framtida. Samtidig er dei opptekne av kor viktig det er at norske forbrukarar vel norsk mat, slik at bøndene får betalt for arbeidet dei gjer og at matproduksjonen kan haldast oppe i heile landet.
Eit anna tema i podkasten er korleis det er å levere dyr til Dalir. For Liv Oddrun og André handlar valet om både dyrevelferd, korte transportavstandar og betydninga av lokale arbeidsplassar. Dei rosar den raske oppfølginga, den gode kommunikasjonen og det dei opplever som svært god service.
Lyttarane får også høyre historia om korleis garden har utvikla seg sidan dei tok over i 2009. Med investeringar, modernisering og mykje eigeninnsats har dei bygd opp ei drift som fungerer godt i dag. Trass i lange dagar og mykje arbeid er dei ikkje i tvil om kva dei meiner om bondeyrket.
– Dette er det finaste livet som finst, seier dei.
Podkasten gir eit nært møte med to engasjerte bønder som viser kva som ligg bak maten på bordet vårt. Her handlar det om arbeidsglede, omsorg for dyra, stoltheit over faget og tru på framtida for norsk landbruk.
